و طلعت الدولة العميقة .......اعمق مننا كلنا

............................................................................................................

يوميات مواطنة مفقوعة......الفقعة السابعة وعشرين....WEREMNA

النهاردة لا فى وقت للتنظير و لافى مجال للجهبزة و لا فرض الراى و لا حتى التفكير ...مجرد التفكير فى مصلحة شخصية على حساب الوطن

انا اخترت اسكت و متكلمش فى حاجات كتير عن اللى بيحصل

: بس مقدرتش مقولش كام كلمة محبوسين فى قلبى من زمان

, فى ناس كتير فى البلد دى....مع الاسف

لا حوء فيهم الطفح اللى طفحوا فيها
و لا المية اللى شربوها من نيلها

و لا الوقوف على اى شبر من ارضها
و لا المتعة ف بحر من بحور مصايفها
و لا نسمة من نسمات ليلها

و لا حرف اتعلموه على سبورة فى مدارسها
ولا لحظة او ذكرى حلوة فيها

ولا حسوا لحظة بخوف عليها

كانهم وساخة بطن

يلعن البطن اللى شالتكو

 

                                        كفاية بقى ورمنا

 

يوميات مواطنة مفقوعة...الفقعة السادسة و العشرين......WEREMNA

"عن العنجهية المصرية اتحدث "

أول كائن #عنصرى فى التاريخ.....هو #إبليس
إعتقد انه أفضل ممن خلقه الله بيده و نفخ فيه من #روحه......فقط لان أدم من عنصر #أدنى من وجهة نظره و هو الطين و هو من عنصر أفضل و #أرقى و هو النار
إعتقد انه بعنصره النارى أفضل المخلوقات....و أبى و عصى خالقه فى دليل صارخ على #العنجهية و الغباء
نستشف إذن أن العنصرية هى أولى الذنوب فى التاريخ...و هى تؤدى الى العنجهية و سلطوية الغباء على عقل الانسان...و منها ينتقل سريعا الى مرحلة سقوطه المدوى

فلسفة فاضية ...مش كده...؟؟؟!!!...ماشى

نتكلم بقى شوية عن العنجهية المصرية.....ايوة العنجهية المصرية......نيجى بقى نطبق الكلام ده علينا و نطلع من دايرة الفلسفة و ندخل على مصيبة الواقع

و استكمالا لمسلسل السقوط المدوى لكل شىء فى الدولة اللى مجاش من فراغ و لا هوة نتاج حكم الاحوان فقط.........عشان بس الناس اللى لو عطست يبقى الاخوان السبب و نعلق كل فشلنا على اى شماعة مش طايقينها و خلاص قال يعنى كده الضمير ارتاح
احنا شايفين نفسنا محصلناش و مجاش زينا و لا هيجى بعدنا.....و نقعد و احنا بنتكلم نستحضر انجازات اجداد اجدادنا و اسلافنا و اللى حكمونا و اللى استعمرونا و الخ الخ
و نلعن ابو خاش الشعوب اللى حولينا عشان طبعا احنا احسن و دم اطهر و عندنا اصل و ثقافة مش عند غيرنا
مش هتكلم عن اللى بنعمله فى دول الخليج اللى طبعا فى الوقت اللى احنا نايمين فيه فى العسل ...سابونا احنا ننام و سبقونا بمليون خطوة لقدام...مدعومين بقى بفلوسهم و لا بغيره....ده طبيعى جدا...اللى يبقى عنده مصادر تجيب فلوس و تعمل نهضة و ميستغلهاش تبقى عيبة كبيرة و غباء كبير...و احنا احسن ناس فيه طبعا
ناس بتشتغل و عايزين يتطوروا........اه طبعا حقهم
نيجى بقى للدول الافريقية اللى احنا طبعا شايفنهم عبيد و شوية ناس عبيطة و لما حد كان يحب يتريق كان يقول للتانى" روح هاتلى لب من تنزانيا ".....مع انه لو شاف تانزانيا و نضافتها هيعيط و يلطم
الناس دى بقى بتبصلنا اننا اسياد......ايوة اسياد و بيبصولنا لفوق ....و نفسهم يبقوا زينا...مش عارفين طبعا الخيبة التقيلة اللى احنا فيها و كتير منهم نفسهم ييجوا بس يشوفوا مصر اللى بيسمعوا عنها
و الناس دى برده عندهم طموح و نفسهم يطوروا نفسهم....و يدخلوا خدمات لبلادهم برده و ده حقهم
انما احنا منسمحش بكده.......عيب عليهم صحيح.......خليهم كده فى غباءهم و تخلفهم
و استمرارا لمسلسل العنجهية و الغباء....حتى اللى عبد الناصر عمله و التاثير الرهيب و احترماهم ليه راح و لمصر ...و حسنى باشا ضيع كل شىء و بهدل علاقتنا بالدول الافريقية مع انها كلها قضايا امن قومى و مستقبل مصر
ليه بقى....عشان اسرائيل كانت عايزة كده طبعا...عشان نوصل للى احنا فيه الناهردة
امال ايه هية اصلها مبتجيش فجاة....كل ده متخططله من زمان
احنا بقى كان ممكن نعمل حاجة...؟؟
اه كان ممكن.....كان ممكن نستمر فى الريادة و السيادة اللى فقدناها بعد عقود طويلة من الشغل .
كان ممكن نساعد الدول دى تتطور بس تحت عنينا و ده كان هيفيدنا طبعا زى ما هيفيدهم....بدل ما مواردهم كلها زى اليورانيوم رايحة لامريكا و اسرائيل و هما لا حول ليهم و لاقوة
كان ممكن مشروع زى ربط نهر الكونجو بنهر النيل و اللى كان ممكن يدخلنا اضعاف حصة مصر من حوض النيل بدل ما نروح نعمل و نصرف على مشروع فاشل زى توشكى و صرفنا ملايين و راحت عالفاضى
انما لا........احنا مش فاضيين اصلا...اهم حاجة الريادة الكروية و بس ..و دى مش حاجة وحشة برده
فريق الكورة المصرى محبوب جدا فى افريقيا و ده انا شفته بعينى فى المحلات هناك بيبقى متعلق فيها صورة للفريق القومى و عارفين اللعيبة باساميهم
كان ممكن كل ده نستغله عشان مصلحتنا لانهم شعوب طيبة بطبعها
انما عشان اللى بيحكمونا عملاء للصهاينة.........و اخرهم العميل الاخير كل شىء هينتهى......و بنسطر السطور الاخيرة فى باب عصر الاضمحلال الاخير لمصر على يد الاخوان اللى ميقدروش يقولوا "لا" لامريكا و لا "لا " لاسرائيل لانهم اللى جابوهم فى الحكم
احب اعرف بقى...بعد ما مرسى راح و رجع بخيبته و قالهم زى ما قال فى برنامج انهم من حقهم يعملوا سدود و غيره و احنا ندعى ربنا.....؟؟؟
ايه راى المؤيدين....ايه الخطط البديلة.........هنعمل ايه فى مصيبة زى دى....؟؟؟

و لا نفكر ليه....اللطم احسن بكتير

و المطاطية حلوة مفيش كلام و الانبطاح مشروع شعب

مشروع نهر الكونغو : http://ar.wikipedia.org/wiki/%D9%85%D8%B4%D8%B1%D9%88%D8%B9_%D9%86%D9%87%D8%B1_%D8%A7%D9%84%D9%83%D9%88%D9%86

%D8%BA%D9%88

                                          كفاية بقى ورمنا

 

يوميات مواطنة مفقوعة....الفقعة الخامسة وعشرين......"WEREMNA"

من يومين و انا فى وسط البلد....و كانت حالتى حالة و رجلى فى حالة يرثى لها و ماسكة عصاية فى ايدى بتعكز عليها

و بنتين صحابى مرضيوش يسيبونى لوحدى ... فوقفنا مع بعض لغاية  ما تيجى العربية عشان يوصلونى

المهم اتفتحت بينا احنا التلاتة مناقشة عن التحرش وطبعا عشان معروف عنى حبى الزايد للمتحرشين و مدحى ليهم فى كل الاوقات و سبهم عالفاضى و على المليان....فكنت بتكلم عن انواع المتحرشين و مين هية البنت الهدف السهل ليهم و بيستهدفوا مين

و الخ الخ

و فى الاخر كنت بحاول اقنعهم ان المتحرش دايما بيجرى ورا  البنت اللى شكلها خايف من التحرش

و فجاة....وقف ادامنا واحد شكله محترم جدا و ابن ناس جدا و تقريبا يا اما فى اواخر التلاتينات  يا فى اوائل الاربعينات

راح قايلى : الف سلامة عليكى 

   فرديت بدماغى بمعنى شكرا

راح قايل: بس تصدقى ان شكلك برده زى القمر و انتى عيانة

صحباتى ...بقهم مفتوح للارض و واحدة اتدورتله عشان ترد عليه و تشتمه

انا: بشاور بايدى اتفضل امشى

هوة......راح سائل واحدة منهم لما لقانا مردناش .: بس هوة انا عايز اعرف...الا هوة  كسر ولا جزع....؟؟؟

انا : اتفضل امشى

و مشى فعلا و معرفش يعينى هوة كسر و لا جزع.....

و انا بضحك من الزهول ان فى ناس هبل كده و ان الناس وصلت لمرحلة من الخبلان و العبط فاقت كل المقاييس

المشكلة انه كان بيتكلم بجد و عايز يعرف حالة رجلى....ههههه

يا عينى يا ربى بجد...الولد كان شكله محترم اوى بجد و يخدع جدا 

او يمكن مثلا كان نفسه يقول كلمة حلوة بس الطبخة باظت منه......هههههههه

كفاية بقى ورمنا                                                   

                          

WEREMNA...يوميات مواطنة مفقوعة...الفقعة الاربعة وعشرين

عشان بس اخلص ذمتى من ربنا و ابقى قلت اللى عندى.....:

يوم الجمعة...شكلها كده فى قلة ادب و الله اعلم....و التهديدات اللى رايحة جاية من الاخوان متطمنش ...و حوار شرف الجماعة و الكلام الفاضى ده و انهم هيبقوا مستعدين للنزول فى اى وقت و النفير العام دفاعا عن شرف الجماعة...

انا معرفش صحة الكلام ده و لكن اللى انا متاكده منه حاجة واحدة بس اراهن عليها بحياتى
ان مش الاخوان بس اللى عملاء امريكا....لا و الف لا كمان
المخطط لازم كل اركانه تبقى مكتمله من نظام و حد بيحميه و حد بيعارضه و احزاب فى مجمل شكلها معارضة و منها كتير مساعد للنظام....و فى شكلها ليبرالى او علمانى او اشتراكى او اسلامى و الهدف منها الحفاظ على سلامة المخطط
اللى دعوا للذهاب لمقر الجماعة فى قرار اتاخد اسرع من الطلقة كرد فعل لضرب دومة و ميرفت موسى مش من فراغ....المخطط الصهيو-امريكى هوة تفتيت مصر و اشعال حرب اهلية و الحمد لله ده حصل من ساعة الاتحادية و تصنيف مصر كدولة فاشلة فى كل حاجة و غير امنة و الحمد لله ده حصل برده

و لازم يبقى حد بيحافظ على المخطط و تنفيذه و ده طبعا هيبقى من الناس اللى هتشتغل على ضرورة نزول الناس و مش بعيد كمان يبقى بيشتغل يومها على بداية الاشتباك.

كتير من اللى رايحين ثوار و حبايبى و اجدع ناس و دمهم محروق زى بالضبط و يكمن اكتر كمان..
و اللى حصل يحرق الدم فعلا برغم انه كان متوقع جدا يومها و مش حاجة غريبة عليهم...
لكن مرواح يوم الجمعة هوة قرار غلط و احنا اللى هندفع تمنه قدام نفسنا و قدام ربنا و قدام الشعب
المرة دى احنا اللى رايحينلهم برجلينا واحنا الى بنقول يا شكل ويا دم
التعامل مع الكائنات الحقيرة دى مش بالطريقة دى برغم انه سهل جدا انى اقول من كتر غيظى ان حلال فيهم القتل زى ما هما برده شايفين كده فينا
كده لن تستقيم الامور.....و مش هنكسب حاجة غير دم زيادة....خروج الامور عن السيطرة...و صدقونى : الاخوان مش هيوصلوا للمرحلة دى من الفجر غير لو هما متاكدين انهم ملكوا زمام كل الامور و فى جيبهم الجيش و الشرطة
و المفاجاة اللى مش واصلة لناس كتير اوى مش عارفة ليه ان السيسى اللى الناس بتجرى عشان تعمله توكيلات هوة جزء من مخطط التمكين اللى شغال على الارض حقيقى من 2005 و السيسى كان بيتضبط عشان يبقى خليفة طنطاوى الخاين و جاى بمباركة امريكا عشان يبقى رمانة الميزان و المحافظ على استمرار تنفيد المخطط الصهيو-امريكى
و مش هيعمل حاجة غير باوامر من امريكا...يوم ما هتديله الاشارة انه يعمل انقلاب هيعمل انقلاب...غير كده محدش ينتظر حاجة
اللى احنا بنعمله اننا بننفذلهم اللى هما عايزينه و بنروح معاهم مطرح ما هما عايزين يودونا زى كل مرة
خلونا مرة واحدة نقول لا و نتعامل بذكاء
دى وجهة نظرى اللى تحتمل الخطا و تحتمل الصواب

اللهم بلغت اللهم فاشهد

                                        كفاية بقى ورمنا

 

WEREMNA....يوميات مواطنة مفقوعة...الفقعة التلاتة و عشرين

بقالى سنة كاتمة فى قلبى و مش بحكى بس لازم بقى اقول لحسن انا خلاص قربت افرقع

لازم احكى عن مغامراتى فى نقابة المهن الاخوانية ...قصدى الطبية اللى بتضم نقابة الصيادلة و الاسنان

كل سنة بروح عشان اعمل التامين الصحى و ممكن كمان اجدد كارنيه النقابة

السنة اللى فاتت رحت و قضيت احلى ساعتين فى حياتى و امبارح كمان قضيت ساعة عظيمة هناك

 : هحاول احكى الموضوع بالمختصر المفيد فى نقط مهمة 

النقابة مكنتش فى احسن حال قبل ما تبقى اخوانية صرف و بشرطة هية هية نفس البيروقراطية و خدمة زى الزفت ...عادى

اللى جد بقى...هوة تاتش العنصرية و فرض الهوى الاخوانى على المكان بلمسة جديدة

السنة اللى فاتت كانت لسة بتتحول و فى طور الفقس ....دخلت المبنى الرئيسى عشان اعمل الكارنية قالولى ادخلى المكتب الاخير..و احب اقول ان المكان فيلا قديمة فى جاردن سيتى ساقها حظها العسير انها تكون مكان للخدمات الحكومية و النقابية

المنظر كالاتى فى الاوضة دى..الناس كلها بدقون و زبايب و خمار...قلت مش مشكلة و انا مالى حاجة متخصنيش المهم الخدمات والمعاملة المحترمة

لقيت طابور طويل و قفت فيه...اصل انا بحب احترم الطوابير اوى

 بدور بعينى فى الاوضة لقيت مخلفات ما قبل الادارة الاخوانية...ملصقات الوحدة الوطنية الهلال مع الصليب اتقطعت و اتقطع الصليب و فضل الهلال ده لو فضل اصلا

المكاتب كلها عليها ملصقات الجماعة او حزب الحرية و العدالة

وصلت اخيرا بعد عناء للموظف اللى هيعملى الكارنيه

طبعا لما لقانى مش محجبة مردش عليا اصلا....فضلت اكرر كلامى و كنت خلاص هشتمه رد عليا بقرف و من غير ما يبصلى و راح رامى الورق عالمكتب : روحى لفلان الفلانى و تعالى تانى عشان تستلمى الكارنيه

مع العلم ان لازم التعامل فى الاوساط الطبية يكون بالالقاب ..يعنى يا دكتور و يا دكتورة...بس طبعا مينفعش الكلام ده و الاحترام من غير حجاب

خلصت الاجراءات و رجعتله قالى نص ساعة و ارجعى تانى يكون خلص و تستلميه

طلعت و لسة هروح اقعد على الكراسى الجلد المريحة اللى محطوطة فى البهو الصغير الجميل اللى ميسعش غير مكتبين و كام كرسى لقيت الادان بيدن و فجاة اتفرشت الحصيرة الكبيرة فى البهو عشان الصلاة و كل الموظفين خرجوا يصلوا

عادى و مش مشكلة بتحصل

مع العلم ان الفيلا فيها اوض كتير ممكن تتعمل مساجد 

خرجت الموظفات وراحوا المصلى

و كبار السن اللى قاعدين اضطروا يقوموا لانهم فى اتجاه القبلة و لمدة اكتر من 20 دقيقة كلنا واقفين مزنوقين فى الطرقة لغاية ما الموظفين يخلصوا صلاة

و لو حد فكر يعدى من وراهم عشان ينزل من على لسلم بيتكعبل فى جزمهم و يقع على وشه

خلصت الصلاة و الموظفات لسة مرجعوش و الطابور بيكبر ...30 دقيقة بالضبط على ساعتى و رجعوا..لانى كنت حاسبة الوقت لاستلام الكارنيه

استلمت و نزلت و انا بضرب كف على كف...

 السنة دى كانت اعظم بقى لانى رحت مرتين فى اقل من شهر

اول مرة ا, نا داخلة متاهبة للاستفزاز و القرف و عارفة هشوف ايه..السنة دى مختلفة....الاخوان فى الحكم

اول ما دخلت لقيت راجل كبير فى السن مكس كده بديع على غزلان جامع الناس حوليه وعمال يقولهم : ما تدوله فرصة سيبوه يشتغل يعنى

انا اتسمرت فى مكانى قدامهم و متحركتش و اضطروا انهم يعدوا من جنب لانى متحركتش من الصدمة و كنت سادة السكة عليهم..النقابة بقت مكان للبروباجاندا لمحمد مرسى

قلت عادى....رحت اشوف لو فى امكانية اجدد التامين الصحى بتاعى لقيت الوقت خلص و قالولى احتمال  نفتح باب استثناءات سيبى اسمك و رقم تليفونك و هنبعتلك...طبعا مش لازم اقول ان الموظف اللى اخد اسمى و عنوانى كان قرفان يبصلى اصلا

رجعت بقى امبارح تانى لما بعتولى رسالىة عالموبايل...خدمة ممتازة فعلا

دخلت و بارقة الامل على وشى ..و اخيرا ابتديت اجراءات التجديد....

الموظف : روحى مكتب 5

انا: طيب

موظف مكتب 5: روحى مكتب 6 

انا: طيب

مكتب 6 مكان مشرق....الموظف قالى روحى الكشك الاحمر

انا: ده فين ده

الموظف: الى هناك ده

انا: طيب

و بضرب بعينى ورا الموظف لقيت مفاجاة جميلة اوى خلت اساريرى ترقص

نتيجة السنة الجديدة 2013

عليها ايه بقى

صورة محمد مرسى و مكتوب جنبها: اللهم وفق عبدك محمد مرسى لخير البلاد و العباد

و لا اى اندهاش

خدت بعضى عالكشك الاحمر و رجعت تانى على مكتب 6 استلم الكارنيه و اتاكد...وقلت ادقدق بقى و الحمد لله نظرى مخدعنيش و طلع اللى انا شفته صح

نتيجة عليها صورة الريس و دعاء 

عادى ماهو حسنى مبارك كان بيعمل كده...ايه الجديد

احنا  اصلا قى سنة 2010 و مفيش ثورة و لا فى حد مات و لا اى حاجة خالص.....

عادى...و كله عادى و كله هيبقى عادى بس احنا نصبر ونسكت

كفاية بقى ورمنا

                  

                          

مباشر.. " دمى و دموعى و ثورتى "

مباشر.. " دمى و دموعى و ثورتى ".....: مقالى الجديد على موقع مباشر

"WEREMNA"....يوميات مواطنة مفقوعة...الفقعة الاتنين وعشرين

تصوير:كريم مغاورى
المكان: محمد محمود..شارع الابطال

النهاردة بقى لا فى ورمان ولا حاجة مضايقانى برغم كل اللى بيحصل

انا بس حابة اشرك الناس فى احاسيسى المتلخبطة و اوصفلكم ازاى ممكن الواحد يكون عاشق ولهان و كاره لحاجة فى نفس الوقت 

              الثورة

                                                

اما يا اخى الثورة دى عجيبة بشكل
ساعات احس انها امى
بتجرى من يوم ميلادى فى دمى
و عروقى تسبح باسمها و تنفر و الدم يقول افتحولى الباب
احاول اكلبش فى حضنها يمكن تدفينى
و ساعات احس انها ابنى
اكرها و العنها و العن ابو يومها
و اكره اللى يقول امين

اشوفها فى عينين صحابى و الرفاق
و فى عينين طفل صغير عمره يا دوب دستة سنين
يشوفنى يقول نفسى ابقى زيك و ياخدنى القدوة و الامل كانى خلاصه فى ايدى و خلاصى فى ايمانه بيا
اهرب منها و اقول يا فكيك , ترجعنى دعوة ست غلبانة تقولى ربنا ينصركم و طبطبة ايد

و لما رجلى تدب جوة الميدان تدب فيا الروح
و ساعات كتير تروح منى الروح
اخاف على نفسى و على صحابى و على الناس
ساعتها ابص فى عينين الرفاق
اشوف الامل و الترقب و الخوف عليا و عليهم
و احس بايدين تطبطب عليا
و لسان يسالنى و يقولى انتى بخير
و ابص تانى استمد القوة و العناد
و احس ان الياس ملوش ابدا مكان
ارجع اصحى و افوق و احس ان امى تعبانة و بتندهنى
باعلى صوت عشان اخد بايدها و اقومها
او ان ابنى حرارته نار ومحتاجنى

تلمنا قعدة امل و تفرقنا جرية من قنبلة
و نرجع نتلم تانى من غير ميعاد
عارفين فين مكان اللقاء
تدمع عينى على حد فينا مصاب
كاننا اعضاء جسم واحد
يتوحد مع بعضه لو اشتكى حد مننا
و ترجع تلمنا قعدة سمر وحب
اما يا اخى الثورة دى عجيبة بشكل

"WEREMNA"......يوميات مواطنة مفقوعة... الفقعة الواحد و عشرين

بلغنى ايها الشعب السعيد ان النهاردة خطوبة ابن مرسى ابو 18 سنة على بنت قنديل ام 15 سنة فى طابا

الحقيقة نزل عليا الخبر كالصاعقة.....و مش قادرة اصدق لغاية دلوقتى

بس الحقيقة لو الخبر حقيقى يبقى فسرلى حجات كتير اوى

يعنى مثلا ....ليه مرسى و قنديل مش فاضيين الفترة دى للبلد و لا الولعة اللى فيها عشان تجهيزات الخطوبة و اكيد برده الجواز لان الناس ده مش هتقعد مخطوبة كتير عشان حرام و كده

فسرلى مثلا...ليه مرسى كان بيبص فى الساعة و هوة واقف جنب ميركل...كان مستعجل يرجع عشان ابنه محتاس فى لون البدلة

عامة ايه يعنى المشكلة...ايه المشكلة 

  لما ناس قصر يتجوزوا.....شريعة دى و لامش شريعة يا متعملين يا بتوع المدارس

ايه يعنى لما نعرف دلوقتى ان الدستور متفصل عشان العصافير دى تعرف تتجوز و هما اندر ايج.... ضاربين بكل حوارات المنطق عرض الحائط

و فى الاخر تقولوا ان الناس دى عايزين يقرفوا الشعب

ابسولولتى...ابدا

الناس دى بيحاولوا يساعدوا نفسهم مش اكتر

اتمنى الخبر يكون مش صحيح

                                                                  كفاية بقى ورمنا
 

                      

"WEREMNA"....يوميات مواطنة مفقوعة... الفقعة العشرين

علياء المهدى قلعت

علياء المهدى لبست

البلد تولع.....ياكش تولع

المهم ان علياء المهدى قلعت

و لازم نشوف حل للموضوع ده

ياخى يعنى هية قلعت تحت باب بيتكم...؟؟؟

و لا كانت بتمثل مصر فى الاولمبياد...؟؟؟؟

فعلا ناس فى البلد دى قالعة هدومها.....و ناس تانية قالعة مخها

  كفاية بقى ورمنا

WEREMNA....يوميات مواطنة مفقوعة ..الفقعة التاسعة عشر

بعد قرار بالاحتجاب كام يوم يمكن اعصابى تهدا و اعرف اهدا واتخلص من العنف اللى وصلتله فى كلامى و تصرفاتى...

كان العود احمد...و مع الاسف لم تهدا اعصابى بعد..و لكن عندى رسالة صغيرة لكل من تسول له نفسه ان يخلع عنى رداء حريتى او انسانيتى و يعطى لنفسه الحق ان يجردنى من اعز ما املك و هو كرامتى و عزة نفسى ....

هقولها بالبلدى كده عشان تفهموا (احتمال ضئيل تفهموا ) :

انا متولدتش و اتربيت و عشت و اتصرف عليا فى مدارس و جامعات...
و اشتغلت على نفسى و عيوبى و قاومت و قومت نفسى قدر المستطاع عشان اوصل للانسانة اللى انا عل

يها دلوقتى , عشان اجى فى يوم اضطر فيه اننى اتخلى عن كل قيمى و كل المبادىء الى باؤمن بيها
و من كتر القرف و الغل ..أضطر امسك سلاح و ارفعه فى وش بنى ادم ( مش انسان)...او اننى افرح فى موت حد..او حتى اتمناه
محدش هيقدر يوصلنى اننى اغير طبيعتى الادمية اللى تعبت اوى عشان احافظ عليها وسط هذا العالم المتوحش و الذى يزداد جنونه يوما تلو الاخر
يا ريت ميبقاش اختبارى فى دينى و انسانيتى على ايدين طيور الظلام و زبانية جهنم و نصبح كالقابضين على جمرة من نار للحفاظ على دينهم
انا عارفة ان جيلنا اتكتب عليه انه يحاسب على كل الفواتير القديمة و يدفع تمن التاخير كمان
و جيلنا كمان مضطر يدفع تمن فشل و غباء الاجيال اللى سبقتنا

 
الخلاصة : انا مش هتغير...موتوا بغيظكم ..و دى جملتكم
و مش هسامح اى حد كان السبب فى الوضع اللى وصلناله دلوقتى ليوم الدين

/المواطنة المصرية

  مروة عباس


                                                 كفاية بقى ورمنا

                                          
                                                      

WEREMNA....يوميات مواطنة مفقوعة...الفقعة الثامنة عشر

عاجبانى اوى الناس اللى شمتانة فى بشر زيهم بيمروا بمحنة كبيرة اسمها اعصار ساندى المدمر و كل واحد فيهم بيطلع امراضه النفسية فى الكلام الفاضى اللى ان دل على شىء..فهو يدل على انعدام الضمير و موت القلب و بياكدلى ان اللى احنا فيه دى اقل عقاب ناخده بسبب تعفن نفوسنا المريضة

*على فكرة : الناس اللى بتمر بالمحنة دى ناس زيك..عايزين يعيشوا و بيتعبوا فى حياتهم و يشتغلوا عشان يوفروا تمن البيت اللى راح او العربية اللى اتحرقت مش زى حضراتنا ملناش لا شغلة و لا مشغلة غير الكلام و شغلانة خالتى شماتة و خالتى اللتاتة

*ليه مفكرتش ان ممكن يكون وسط الناس دى قريب او صديق او جار
* تخيل نفسك كده مثلا فى اسوا الظروف اضطريت تسافر تعمل عملية هناك و صادفت انك بسبب حظك الاسود حضرت الكارثة و جم يطلعوك من الرعاية المركزة فى المستشفى بسرعة وانت بتموت و مش قادر عشان الاعصار بيدمر المستشفى..كان هيبقى احساس حضرتك ايه...؟؟...اعتقد ان انا مش محتاجة اشرح

*ليه متخيلتش انك كنت ممكن تكون فى نفس الموقف بما انك واحد شمات , بس سبحان الله فى نفس الوقت بتموت على الهجرة هناك لاى حجة كانت بقى وممكن

تموت غرقا او حرقا عشان تروح اى بلد من بلاد الكفر (من وجهة نظر حضرتك طبعا)..بس هما برده وحشين فى نظرك

*يا ريت متجيش تشتكى بقى لما تحصلنا مصيبة او كارثة زى زلزال مثلا و احنا الحمد لله مجربين قبل كده..و نلاقى العالم شمتان فينا و بيقول احسن و فرحان فينا بحجة اننا مسلمين ارهابيين او بتحكمنا ادارة مش عاجباهم

*متزعلش لما حد يقول عليك انسان عنصرى...لانك مش عنصرى و بس..انت اصلا حيوان,و شايف ان مرور بشر ملهمش ذنب بمحنة هوة شى بيشفى غليل صدر حضرتك و انت اصلا مش دريان و لا فاهم اى حاجة حواليك

فى الختام : انا اسفة اننى قلت عليك انسان...انت لا ترقى لهذه المنزلة
و الحمد لله الذى عافانا مما ابتلى به غيرنا من موت القلوب
 

                                           كفاية بقى ورمنا

WEREMNA....يوميات مواطنة مفقوعة....الفقعة السابعة عشر

ده ملخص سريع عبارة عن اسئلة منطقية جت على دماغى من ساعة ما موضوع الفيلم ظهر على الساحة و خلال الصدامات قدام السفارة والخ الخ..كنت بكتبها كستاتيس عالفيسبوك عندى

اكيد اجابات الاسئلة دى توصل و لو لجزء صغير من حقيقة اللى حصل و دوافعه و نتايجه *

اسئلة نهاية اليوم الاول بمناسبة مسلسل الفيلم المسىء و رد الاعتبار :

-كيف تكون مسلما غيورا على دينك و دمك حر و لا تقبل الاهانة لرسولك و تساعد على تنفيذ المخطط الصهيو-امريكى فى نفس ذات الوقت ؟؟

-طيب اى شخص بربع عقل...سالت نفسك لماذا هذا التوقيت بالذات الذى يتزامن مع ذكرى 9/11 ؟؟؟

-ايه اللى استفدته و افدت بيه قضيتك و اسلامك لما هتفت لبن لادن و اكدت نظرية الارهاب الاسلامى و مساندة الارهابيين و اعطيت بنفس

ك صورة ان الملتحين يؤيديون العمليات الارهابية و الجماعات الارهابية و الخ الخ من الستيريوتايبنج للمسلمين امام العالم اللى اغلبه من المغيبين و الاعلام الصهيونى متحكم فى توجهاتهم و انت بمنتهى السذاجة او عن قصد بتساعد فى كده ؟؟؟

- مسالتش نفسك مين اللى ورا الموضوع..؟؟..مين موريس صادق و مايكل منير و غيره و غيره..؟؟؟

الاجابة بقى ان الناس دى لا يمثلون الاقباط و لا المصريين اصلا لانهم عملاء و خونة و باعوا دينهم و وطنهم من زمان و موريس صادق اسقطت عنه الجنسية من زمان بسبب ممارساته

من شهور عدى خبر و لم يتم التركيز عليه لاننا كنا فى وسط مذابح و دم و مش فاضيين لخبر كارثى زى ده..و هو افتتاح السفارة القبطية فى جنوب السودان اللى انفصل بسبب امريكا لمصلحة اسرائيل اللى طبعت معاهم بسرعة الصاروخ

و طبيعى جدا ان الاخ موريس و اعوانه يكونوا من ضمن المخطط المزعوم لخراب مصر و المنطقة

و بالتالى من وجهة نظرى اللى على ادى :

الحرب الفترة الجاية محتاجة ذكاء مش حماقة و غباء و تصرفات غير محسوبة.....الفكر لا يحارب الا بالفكر و الدهاء و المكر لا يحاربوا الا بالمثل

يا ريت و لو مرة نكون فعل مش رد فعل و فاعل و مش مفعول به

الفترة دى امريكا بتحاول تصدرلنا صراعات جديدة على المجتمع المصرى و نجاحها يعنى سقوط مصر فى براثن حرب اهلية وبتالى سقوطها الكامل و سقوط باقى المنطقة العربية :

صراع سنى- شيعى....صراع دينى - لا دينى.....و طبع لازم ندلق شوية بنزين على القضية الازلية و هى الصراع الوهمى الاسلامى -القبطى اللى بيحاولوا بقالهم سنين يخربوا بيه مصر بمساعدة نظام مبارك و النظام الحالى اللى مش هيختلف فى حاجة غير انه هيكمل الخطة

يبقى نفوق و نقف مع بعض ايدنا فى ايد بعض يا اما هنضيع الى الابد و البلد هتسقط و تنتهى مصر ....الاختيار لينا مش لحد تانى.

اسئلة نهاية اليوم التانى....:

-اشمعنى فيلم تم انتاجه من اكتر من سنة ...و هو لا يرقى لوصف فيلم اصلا...هو( low Budget Movie ....يتعرض دلوقتى و فى التوقيت يتزامن مع ذكرى احداث سبتمبر...اشمعنى يعنى...هية حبكت مثلا..؟؟؟

-اشمعنى القس المبجل تيرى جونز صاحب قصة حرق المصحف اللى المسلمين كلهم بيكرهوه ..يسمى يوم 11/9/2012 يوم محاكمة محمد و يعلق دمية سخيفة مشنوقة على انها هوة ..الا انه يكون امعانا فى الاستفزاز عشان لو منفعش مخطط الفيلم تمشى المحاكمة او الاتنين مع بعض يبقوا قنبلة غير قابلة للرفض..؟؟؟

-اشمعنى يعنى يتم اقتحام سفارات ليبيا و تونس و مهاجمة السفارة فى مصر و تيجى بيروت فوق البيعة...؟؟؟...اشمعنى الدول دى بس اللى تم زرع انظمة دينية فيها...؟؟؟

-ازاى سفارة اكبر دولة فى العالم اللى جاردن سيتى متقفللها مخصوص و بيحرسها صاعقة و محدش يقدر يعدى نقطة التفتيش هناك حتى الموظفين من غير تفتيش دقيق و ياما اتقرفنا ايام الاحداث الكتير اللى عدت و احنا معديين من هناك و اللى يسالك انت رايح فين و جاى منين...يتم مهاجمتها بالمنظر ده و انزال العلم و المشاهد المقرفة اللى احنا شايفنها دلوقتىو تتفتح كوردونات الامن عادى جدا...و طبعا مش محتاجين ننوه ان السفارة ارض امريكية فى مصر....؟؟؟

-فين الحلوين امثال حازم ابو اسماعيل ..و صفوت حجازى و غيره و غيره اللى دايما يدبسوا الناس و يجروا هما...و لا صحيح المرة دى ملعوبة صح مش محتاجة تسخين...؟؟؟

- لما ان شاء الله.. السفير الامريكى على سن و رمح اللى المواطن العادى بيتحركله اسطول لحمايته يتقتل...تفتكروا امريكا هتتصرف ازاى...؟؟؟

- يعنى تفتكروا ان تدخل الناتو و الملايين اللى كانت بتتصرف يوميا عالحرب ملهاش تمن....مش لازم ليبيا تدفع التمن و لا ايه..؟؟؟

-ليه المسلمين برا فكروا يوزعوا كتب و مصاحف لشرح الاسلام و حياة الرسول و محدش فيهم فكر يعمل اى تصرف همجى و احنا بس اللى اتفتحتلنا السكة و اعملوا اللى انتوا عاوزينه...؟؟؟

- ليه مفيش كنايس اتهاجمت لغاية دلوقتى او مسيحيين اتاذوا و التركيز كله على السفارة..؟؟

- ليه مفيش حد هز طوله فى بلاد تاوى الكعبة المشرفة و سفارات امريكية برده...؟؟؟

- هل الاخوة الافاضل اللى عند السفارة حاليا اللى بيسلوا وقتهم و يغنوا السح الدح امبو و عمالين يهزروا و يجروا و يشتموا اوسخ الالفاظ خدموا الاسلام فى حاجة ..هوة سيدنا محمد هيبقى فخور بيكو كده مثلا...؟؟

- ليه دايما فى اى مصيبة يتم التلويح على المعونة و الفلوس اللى بناخدها ....؟؟؟

*لو لسة شايف انها معركة كرامة و دفاع عن كينونتك...هكملك شوية اسئلة تانية برده...:

-ازاى اصلا يبقى عندك كرامة و انت واكل شارب لابس من منتجات غيرك...؟؟؟

-تليفونك..كمبيوترك و لابتوبك مش من اختراعاتك...و لا الاجهزة الطبية اللى بتتعالج بيها..و لا العلوم الحديثة من اجتهادك و ذكائك اللى بلا حدود اللى مبنستخدموش غير فى النصب و الاحتيال...

تشدقك بدين مختارتوش اصلا و احساسك ان انت طالما مسلم بس مع ان تصرفاتك لا توحى بكده اصلا و لا اخلاقك... ميخلكش تحس ابدا بالتعالى و انك اسمى من كل العالم لان ببساطة خليت نفسك و دينك مهزاة عند الكل

لما نبقى عندنا استقلالية و سيادة و اقتصادنا حر و معندناش ناس تعشق الخيانة و بيع نفسها و بلدها ...نبقى نتكلم و نبجح و نعلى صوتنا...بس اصلا ساعتها مش هنحتاج نعلى صوتنا لان هيبقى لينا حق الفيتو و العالم كله مستنى راينا و مواقفنا

اسئلة نهاية اليوم الرابع بس دى للاذكياء فقط....:

- ماذا تستشف من كلام اوباما ان مصر حاليا اقل من حليف و فى نفس الوقت مش عدو فى الوقت ده بالذات...؟؟؟

-اشمعنى ده فى نفس الوقت اللى رفض فيه اوباما يقابل نتنياهو و اتحجج بسفره...؟؟

- مرشح الرئاسة رومنى الجمهورى ( المتطرف فكريا )...يا ترى هيستفيد ايه من تاكيده على ان موقف اوباما تجاه اللى بيحصل ضعيف و عدم قدرته على الوقوف بحسم على الاحداث...و ان صورة ام

ريكا اتهزت و اتهزات بسبب ضعف ردود فعله..و انه رومنى احسن من يتولى رئاسة امريكا عشان يقهر الحشرات المسماه بالعرب و المسلمين الارهابيين اللى بيتعدوا على كرامة اكبر دولة فى العالم اللى هيحميها رومنى لو تولى الرئاسة لنجدة بلاده من رئيس ضعيف الشخصية..و كل ده طبعا و الانتخابات عالابواب...؟؟؟

-يا ترى ايه تاثير كلام فاينانشيل تايمز : ان موجة العنف المضادة ضد امريكا تنذر بانحصار دورها كقوة عظمى....يا ترى الامريكان رايهم ايه فى الفترة دى بالذات..؟؟؟

-يا ترى خطاب مرسى الطويل عن الاحداث...اللى قال فيه ان من يهين الاسلام نعاديه...طب ليه..؟؟؟ و كل ده عشان يا ريته حصل فيلم , ده طلع تريلر..فى الوقت اللى بلده فيه مولعة...؟؟؟

- طيب...تعتقد ايه اللى ممكن يترتب على اقتحام معسكر خاص بقوات حفظ السلام فى سيناء..و حرق برج مراقبة.و عربية مطافىء...و استيلاء المقتحمون على اسلحة و اجهزة لاسلكى من بعض افراد القوات و اصابة 3 من القوات الكولومبية...؟؟؟...يا ترى ده بيحصل فى بلاد مستقرة و لا فيها او على وشك حروب او كوارث...؟؟؟

-يا ترى ايه اللى ممكن نستفيده كعرب و مسلمين و ساكنى دول العالم الثالث كما يسموننا..لما دول عربية (خاصة اللى قامت فيها ثورات الربيع العربى و اللى تم فيها زرع انظمة اسلامية)...تصنف على انها بلاد تحكم بانظمة ارهابية او متطرفة و غير قادرة على حماية شعوبها او الاجانب و الجاليات بها...؟؟؟؟

-يا ترى ايه راى الامريكان اللى داخلين على انتخابات لما يسمعوا على السى ان ان من شوية المذيعة و هى بتسال المسئول عن جماعة الاخوان فى لندن و بتقوله : هوة ليه الجماعة فى مصر متدخلتش لحماية السفارة و الناس و فض الاشتباكات..؟؟ فقالها : اصلنا مرتبطين اوى بسيدنا محمد و منقبلش حد يهينه...!!

و فى اخر الحديث تاكد عليه لو مصر هتقدر فى المستقبل تحمى السفارات و الدبلوماسيين و هوة يستعبط فى الرد عليها...؟؟؟؟

-طيب ناخد دى..اوجد العلاقة ده اذا وجدت اصلا بين :

الصراع بين البنتاجون ( اللى كان عايز شفيق) و الكونجرس ( اللى كان عايز الاخوان) بما ان امريكا دولة مؤسسات...و مشروع اوباما لتخفيض ميزانية البنتاجون لمليارات خلال عشر سنوات و حرمان بعض الضباط من التامين الصحى و تخفيض المعاشات و الخ الخ و بالتالى التاثير على الجيش الامريكى و مشروعاته الاستعمارية فى المستقبل...

و رفض رومنى للمشروع و تاييده للبنتاجون و تاكيده ان ده فشل من اوباما و ضربة للجيش الامريكى العظيم...

تفتكر ده يكون سبب خطة تفشيل اوباما قبل الانتخابات و بيعه بالطريقة دى و تبقى بالمرة ضربات موجعة تخدم المخططات الصهيو-امريكية فى المستقبل...؟؟؟

اخر سؤال بقى و هوة بعيد شوية عن اللى بيحصل..و لكن الشىء بالشىء يذكر الحقيقة : هوة لسة فى ناس مصدقة ان الثوار كانوا عايزين يقتحموا وزارة الداخلية ايام محمد محمود..؟؟

اعتقد احنا دلوقتى بنشوف اللى مصمم على اقتحام مكان بيعمل ايه حتى لو اتبناله جدار بيلف من اى مكان طالما فى هدف ..مش يقعد يتضرب 6 ايام و يتقتل منه اكتر من الف مع انه لو عايز الوزارة كان بمنتهى البساطة بدل ما يقف عند مدخل شارع ملوش دعوة بيها اصلا مجموعة تلف و تدخل الشيخ ريحان اللى هوة شارع الوزارة اصلا و تدخل..ده لو اصلا كان الهدف من الاول و اللى هوة حماية الميدان و الثوار من الامن مش الوزارة خالص....!!!

                                                                كفاية بقى ورمنا