اخيرا و بعد طول انتظار بالنسبة لنفسى...قدرت ارجع اكتب تانى الحمد لله بعد فترة من القرف لا كنت قادرة اكتب فيها لا اليوميات و لا نوتس و لا حتة ستاتيس على الفيسبوك
الموضوع بقى المرة دى استفزنى جدا....عشان هوة استكمال لاستحمار الشعب الغلبان.......حريق المجمع العلمى
و لاننى حسيت ان الاعلام و المجلس السكرى بيستعمانى و بيستحمرنى كالعادة كاننى لا بشوف و لا بفكر و لا بسمع ...قررت افكر بصوت عالى شوية و اجمع شوية نقط كده يمكن توصلنى لحاجة و توصلنى للجانى اللى طبعا عمرنا ما هنعرفه زى فى حادثة حريق القاهرة كده
حقيقة المجمع العلمى :
*الصورة دى قمت بتصويرها اثناء الاعتصام و قبل الحريق بحوالى عشرة ايام
و اود ان اناقش بعض النقاط اللى توصلتلها كمواطنة مصرية بتحاول تشغل دماغها
و اود ان اناقش بعض النقاط اللى توصلتلها كمواطنة مصرية بتحاول تشغل دماغها
اولا : اود الاشارة الى نقطة مهمة جدا...و هى عمر المبنى اللى التليفزيون المصرى و من وراءه اغلب الفضائيات و وسائل الاعلام رددت ان عمره 200 سنة و ان اللى انشاه هو نابليون بونابرت
طب سؤال : هوة مش برده اللى اسس القاهرة الخديوية و خصوصا تلك المنطقة المحيطة بالمجمع العلمى هو الخديوى اسماعبل.. و قد حكم مصر من عام 1863 يعنى بعد جلاء الحملة الفرنسية كده بحوالى 62 سنة...و قبل ان يؤسس الخديوى منطقة وسط البلد و كانت كلها عبارة عن برك و كثبان رملية
النقطة الثانية : ان الطراز المعمارى لمبنى المجمع العلمى لم يكن موجودا ايام الحملة الفرنسية...و بالتالى نصل الى ان عمر المبنى ليس 200 عام و لم يؤسسه نابليون بونابرت بل اعتقد انه كان جزء من دايرة قصر اسماعيل باشا المفتش و هو مجلس الشورى ..و كان من عادة اسماعيل باشا ان يكون هناك مبانى ملحقة بالقصر للموظفين و الجوارى و نتاكد من تلك النقطة اذا نظرنا الى قصره فى لاظوغلى الذى لا يبعد كثيرا عن قصر مجلس الشورى و عادة تكون مبانى بسيطة و غير مزخرفة يعنى ملهاش قيمة معمارية كبيرة ....و دى نظرية افتراضية منى, يعنى بحاول افكر بمنطقية شوية
يعنى نابليون اسس المجمع العلمى مش المبنى نفسه اللى اتنقل ليه المجمع بعد كده بكتير.
ثانيا : اذا نظرنا الى الصورة بتمعن , الى الشباك و الشيش....هل يعقل ان مبنى زى ده و بالقيمة الرهيبة اللى قرفونا بيها طوال الايام الماضية و اللى يحتوى على كنوز ادبية و علمية, يكون ده منظره...ده اى عيل لو جاب اجنة ممكن يفتح الشيش و يدخل ياخد اللى هوة عايزه و يطلع و ماحدش هياخد باله برده....بس ده طبعا لو كان حد اصلا يعرف ان ده المجمع العلمى
ثالثا : هل يعقل ان بعد كارثة حريق مبنى مجلس الشورى ان المبانى المشابهة اللى معروف ان تكوينها اغلبه من الاخشاب و سهل جدا حرقها...الا يكون هناك طفاية حرق واحدة توحد ربنا او نظام تامين ضد السرقة او ضد الحريق للمبنى...و احنا عارفين كويس اوى ان لو حصله حاجة فرنسا اول بلد هتسرخلنا
طب سبحان الله ده حتى لما اتحرق مجلس الشورى و عقبال ما فاقوا و سابوه يولع حبة حلوين جابولنا طيارة هليكوبتر تجيب ميه من النيل و تدلقها على المبنى...طب سؤال : هما لو كانوا عملوا كده كان الطوب هيوصل للطيارة و يوقعها مثلا ؟؟
..طب بلاش : هوة مش مبنى قيم زى ده يستاهل ان احنا نبعتله طيارات مجهزة زى اللى بعتها المخلوع لاسرائيل الشقيقة عشان يساعدها فى السيطرة على الحرائق اللى حصلت عندهم وسبحان الله ده كان بعد حريق مجلس الشورى اللى ادعوا فيه عدم وجود تجهيزات للسيطرة على الحرائق دى
ماهو طبعا ...اسرائيل اهم اكيد...انما المبانى المصرية القيمة فى ستين داهية...المصريين نفسهم فى ستين الف داهية كمان
( ا لطف حاجة راى سامح سيف اليزل فى موضوع الطيارة اللى تطفى النار....قالك ان مكانش ينفع نبعت طيارة زى ما حصل فى حريق مجلس الشورى تطفى الحريق بمية عشان الكتب متبوظش....ده طبعا على اعتبار ان مجلس الشورى مكانش فىه مكتبة فيها كتب و مخطوطات نادرة ...عن تاريخ مصر ...و لا على اعتبار ان عربية المطافى اللى كانت عايزة تدخل دى كان هترش بودرة تلك....و لا على اعتبار ان هما كانوا هيطفوا الحريقة تانى يوم لما السقف يقع فتبقى بركة....طب نفهم من كده ان هما قعدوا يفكروا و الحريق شغال و قرروا ان مينفعش طيارة و بالتالى خليها تولع و احنا عملنا اللى علينا و فكرنا و لا ده اصلا كان قرار متاخد من قبل الحريق و لا دى حجة اخترعوها عشان يبرروا اللى حصل و موقفهم المخزى؟؟؟؟.)
يبقى نستنتج ان المؤامرة على البلد دى قديمة جدا...كل حاجة جاهزة للمؤامرة...لما احب احرق مبنى او حتى القاهرة كلها هلاقى مليون سبب و حجة و كمان حد ارمى عليه اللوم و الف واحد حقير ينفذلى اللى انا عايزه
كفاية بقى ضحك عالدقون .....!!!
مين اللى طلع العيال البلطجية دى فوق المبنى و سابهم يرموا طوب و مولوتوف ؟؟؟
مين ادى نفسه الحق من الضباط و العساكر اللى كانوا ورا المبنى انهم يشوفوه بيتحرق و يكملوا رمى طوب عادى ؟؟؟...و ده مش كلامى و لا استنتاجى ده بالفيديوهات و الصور .
طب سؤال اهم : مين اللى فتح الشبابيك بتاعة المبنى برغم ان الاحداث مشتعلة بقالها اكتر من 24 ساعة و كانت على اشدها...و اكيد يعنى لو احنا حماة مصر و حماة منشاتها و شايفيين المولوتوف و كرات النار الملتهبة....يا مامى ..رايحة جاية....طب على الاقل منطقيا هقفل الشبابيك لحاجة تدخل كده و لا كده و تولع فى المبنى....و لا ايييييه ؟؟؟؟؟
ده اذا كان المبنى اصلا ولع بعد فتح الشبابيك .
حاجة تانية و النبى نفسى اقولها :
" الانسان هو من يصنع الحضارة و ليس العكس "
وجود هذه الكتب القيمة لم تصنع شعبا مثقفا....و وجود حضارة عظيمة فرعونية و قبطية و اسلامية..لم تصنع شعبا اغلبه مثقف...كم مصرى يعرف قيمة كتاب " وصف مصر " ؟؟؟..كم مصرى يعرف عدد مجلداته ؟؟
و لكن من ماتوا و من قتلوا من الاطباء و المهندسن و العلماء هم الذين يصنعون الحضارة و يكتبون الكتب و يستطيعوا ان يصنعوا مصرا جديدة مواكبة لبقية العالم فى التحضر و التقدم العلمى
فهل حافظنا على تاريخنا حتى نعرف طريق مستقبلنا ؟؟
كفاية بقى ورمنا
