هوة انا عملت ايه يا ربى فى حياتى عشان بجملة اللى انا بشوفه كل يوم فى البلد دى تبقى كمان الحاجة الوحيدة الايام دى اللى بتسلينى و تبسطنى ...اللى هية الاولمبياد طبعا...تبقى متابعتها سخيفة و سمجة بسبب المعلقين اللى عفا عليهم الزمن سواء كانوا رياضيين اصلا او معلقين و خلاص..
و طبعا الفارق شتان...الاول بيعلق من منطلق خلفيته الرياضية و اللى من خلالها طبعا هوة شايف كل حاجة تمام و جميلة و كله قايم بدوره على اكمل وجه بس هوة سوء التحكيم و الظلم دايما الى جايبنا ورا
و التانى عنده خلفية برده ...بس ماسبيروية ..و ما ادراك ما الخلفية الماسبيروية
احلى حاجة ان يبقى المعلق لا فاهم حاجة و لا دريان بالدنيا اللى حوليه و مهمته فى الحياة هوة تشويه متعتك فى المشاهدة...و يا سلام بقى لما ندخل فى شوية مصطلحات جديدة بعيدة عن نوعية "الله هلا هلا و يا حبيب والديك"...اللى استبدلناها ب: ابوس رجلك يا فلان هاتلنا الميدالية دى....و بلاوى تانية و لا كانى بتفرج على فيلم الحاسة السابعة و هاتلنا منه لقب و اتنين
اما كارثة النهاردة بقى الختامية...طبعا بعد اللى حصل من بعثة المصارعة الحرة لما مكلفوش خاطرهم يبلغوا اللعيبة و لا يشوفوا شغلهم و يقولولهم ان الماتش بدل الساعة 1 بقى 9 الصبح و الماتشين راحوا عليهم
ما علينا مش هعلق عشان المرارة بس
المضحك بقى لما ابقى بتابع الماراثون..اللى كسب فيه لعيبة من اوغندا و تانزانيا و من افريقيا اللى احنا بنموت و نتنطط عليهم اننا طبعا احسن و اننا رواد الرياضة فى افريقيا ..مع ان جنوب افريقيا مشلفطانا من زمان اصلا
قام المذيع العظيم اللى انا مش عارفة هوة مين بالاشتراك مع زميله فى الاستوديو بالتريقة على لاعب تانزانيا و قاله :
ايه ده تانزانيا؟؟
حتى تانزانيا كمان ؟؟؟...هوة مش احنا افارقة برده و لا ايه..ايوة اه احنا افارقة و ريادة و الخ الخ اى عبط
...البيه مستغرب و بيقلل من تانزانيا و بيتريق ان بقى عندهم لعيبة جامدين
..تانزانيا , اللى احنا منطولش و نوصلها اصلا
الناس دى بتحترم الطبيعة جدا و بلدهم نضيفة فى المجمل مع بعض الاستثناءات اللى انا شخصيا مشفتهاش بس اكيد موجودة فى العاصمة زى اى بلد , و قوتهم الجسمانية رهيبة بحكم الطبيعة الجغرافية للمكان
انما طبعا لا ....تفوت علينا دى..داحنا اسيادهم و اسياد افريقيا كلها....نتريق اه, نقل ادبنا ميضرش..انما نعمل حاجة مفيدة لا
و الاتحادات كلها كوارث من سنين و لا حدعايز يتحرك...مش نتلهى على عنينا مثلا بعد صفر المونديال و نحط لساننا جوة بوقنا و نشتغل صح عشان يمكن...يمكن نوصل و لو اننى اشك طول ما العواجيز ماسكين بايدهم و سنانهم فى الكراسى و الاتحادات كلها مسروقة و حتى كانوا مستخسرين يجيبوا للبعثة لبس اصلى و فضحونا و فى الاخر نايك عطفت علينا و اديتنا لبس ببلاش
لا لسان طويل بس و تريقة عالفاضى
منظومة فاسدة حتى النخاع و لازم تتحش من جدورها
انا ببص للصين و بعيط....بحلم فى يوم من الايام نوصل لربع اللى وصلوله فى كل حاجة و بقوا قوة لا يستهان بيها فى كل المجالات
يا رب صبرنى لغاية ما نوصل للى احنا عاوزينه
كفاية بقى ورمنا
