"WEREMNA" يوميات مواطنة مفقوعة......الفقعة الرابعة عشر

كفاية  يأس و احباط ارجوكم.............................................

محدش يقنعنى ان السيناريو ده مكانش وارد بل مؤكد ان العسكر هيعملوا علينا كماشة و هيبقى مرشحهم كائن من كائنات النظام.....كله قعد يفتى و اللى يقول عمرو موسى و اللى يقول شفيق..ان شالا يكون الجن الازرق ابو قرون طويلة, و اللى قدامه واحد من الاخوان....

انت نسيت نفسك و لا ايه...انت وقفت قدام المدرعة و شوفت الموت مليون مرة....يبقى الاهبل ده بمجلس القلل و شيوخ المنصر اللى وراه هيخوفنا , حتى لو حاولوا يموتوك و يرهبوك بجيوش و مدرعات و رصاص..ماحنا عارفين اخرهم ايه

 
اللى بيحصل ده متوقع جدا و عز الطلب عشان نكمل ثورتنا....شاء من شاء و ابى من ابى لان سيناريو الهنا الاسرى و ان السلطة تتسلم و الكلام الفاضى ده ملغى من التفكير من يوم التنحى و اللى يفكر غير كده يا ريت يراجع نفسه

ايا كان الرئيس اللى هييجى..هو دمية فى ايد العسكر و العسكر هيحددوله سلطاته..و يا سلام بقى لو الرئاسة و البرلمان فى ايد واحدة يبقى كمان الدستور هيبقى شكله ايه و برطعة فى البلد...اما لو الرئيس حاجة و البرلمان حاجة تانية هياكلوا فى بعض و يبقى صراع سلطة و يخلصوا على بعض...( وجهة نظر برده و احتمال )

 
اما بقى سيناريو انى اروح انتخب الاخوان عشان اقف قصاد العسكر و اجيب لنفسى القرادة اللى هتلبد فى الحكم زيها زى العسكر بالضبط و مش هيطلعوا غير بالدم ده لو طلعوا....و يوم ما هتحاول يا عينى تخرج عليهم هتبقى مخالف لشرع الله و تتنصبلك المشانق....مش حل برده لانى يبقى كده انا معملتش حاجة غير اننى استبدلت طاغية عجوز ووراه شوية عواجيز و نظام خايف و بيحتضر و مرعوب من الحساب..بنظام تانى قوى و عنيد عنده مال و عتاد و شباب و ملايين من المؤيدين

 
اما بقى جملة انتخب اللى ساعدنى يوم معركة الجمل و الكلام الفارغ ده مش عارفة طلع منين...معركة جمل ايه حضراتكم...ان كنتوا نسيتوا اللى جرا هاتوا الدفاتر تتقرا زى ما بيقولوا..مين اللى كان فى الميدان و عقد الصفقات و حضرتك بتموت فى الميدان خلال ال18 يوم الاولانيين ؟؟؟..
مين اللى طردك تانى يوم التنحى لما حبيت تكمل بيات فى التحرير لغاية تحقيق المطالب؟؟؟....
مين اللى سابك فى محمد محمود و قال عليك بلطجى و كان بيحضر لانتخابات مجلس الشعب و سايب اغلى ناس تموت بالمئات؟؟؟؟
مين اللى وقف ضربك و عمل كوردون قدام مجلس الشعب لما رحتله فى مسيرة؟؟؟؟؟

مين اللى رفض يعترف حتى ان كان فى عنف و خرطوش بيتضرب عالثوار فى احداث وزارة الداخلية و عمل اهبل و مش من هنا وباع دمك ؟؟؟؟

و بالمنظر ده..و الحالة الثورية الفريدة دى اللى ممكن تقعد بالسنين....هيكون خيار عمل ثورة عاللى مش عاجبنى هو الحل الاول

و عز الطلب بقى لو حد جديد...هيتطلب منى استراتيجية جديدة فى التفكير و الثورات...مانا مع عدو جديد بقى , وهو مش عاجبنى و لا عايز يتفاهم...ده حتى كل السلطات فى ايده....!!!
و مع الاسف سيناريو الاخوان ابشع بمراحل من سيناريو العسكر....فنحن مع الاخوان بنخاطر بانقلاب عسكرى حتمى....او حرب اهلية....او انشقاقات اجتماعية على اقل تقدير

  
كفاية بلاوى و النبى....و يا ريت نفوق بقى و نبص حوالينا و نشوف مين اللى مخدوعين لسة فيهم و هما عاملين ثوار و مضللين الناس وراهم و هما كل يوم بينكشفوا للناس و مش عارفة ازاى محدش واخد باله

انا مش هقدر اقول ننتخب مين...لان الاتنين بالنسبالى اداة فى ايد العسكر...و مقدرش انجم و اقول ايه اللى هيحصل
انا بالنسبالى الرئيس تم اختياره من قبل العسكر و خلاص..اللى بيحصل ده من الاخر الجارنيش بتاع الطبخة عشان تبقى مسبوكة

ممكن كل اللى اكون قلته كلام فارغ و لا ليه اى معنى وممكن يكون كلام مفيد

بس اللى عايزة اوصله فى الاخر حاجة واحدة ان الثورة هى الاقوى...مفيش موضوع اصل الشعب كره الثورة و الكلام ده...التصويت للثورة هو الاقوى و بالارقام و الحسابات و ده دليل على انها لسة موجودة و بقوة...لكن احنا اللى بنبهدلها معانا

يا الثوار يتحدوا على موقف واحد ياما خلاص كده

الاتحاد او الموت...ده اخر الكلام

كفاية بقى ورمنا